爱楼主阅读
爱楼主阅读
位置:爱楼主阅读 » 第二十章﹕Milk哥的铜锣湾

第二十章﹕Milk哥的铜锣湾

技术 2016-02-01 22:03:37 评论

中国人有句说话叫「命水生成」。

有个人一出世就衣食无忧﹐但成家人就担惊受怕﹐一处地方最耐都唔会住超过一年。无论个老豆点样有钱﹐坐靓车住大屋﹐读书果阵其他有钱同学仔都好似睇唔起自己。虽然尽晒全力去做好人﹐做好学生﹐做好老公﹐但系条命生成一世人都会比人当系坏人。虽然自己好有生意头脑﹐但系D手下都系老臣子﹐烂仔出身﹐个个恃住辈份高就唔听自己支笛﹐仲当自己系二世祖咩都唔识。呢种感觉好讨厌﹐但系既然条命局住自己坐得呢个位﹐就一定要做得好好睇睇﹐就唔信自己会做得差过班老鬼…

呢个人就系﹐永兴会「四八九.龙头」马文兴。

铜锣湾之死

第二十章﹕Milk哥的铜锣湾

「永兴会」同「诚和会」内两大堂口结怨消息绝对震憾﹐尤其系「东方桌球城」同「大中华麻雀馆」两次劈友﹐「诚和会.永德堂」大佬福建德被杀一事﹐好多人都将呢件事同当年「新同乐大撕杀」相提并论。而湾仔「O记」对近排江湖0既腥风血雨非常关注﹐经常查牌令到铜锣湾D生意都淡0左一排﹔虽然「O记」明知福建德0既死一定系「永兴会.福安堂」D人做﹐但系刀手做事不嬲都好小心﹐所有架生都无指摸﹐而当日D衫裤鞋袜都会烧毁﹐受伤兄弟多数都由相属0既私家医生医治﹐所以警方都好难有证据「拉人封铺」﹗

福建德被杀一事令陈凯文系江湖上声名大噪﹐而最具争议性系麻雀馆内阿文竟然失去常性郁手打大佬﹗有人觉得陈凯文当时太过紧张所以失去常性﹐不分你我乱斩一通﹔但亦有人话阿文系想乘机趁乱郁自己「保家」﹐目的系借刀杀人﹐谋刀手个位坐﹗但系传闻「永兴会」龙头马文兴有自己睇法﹐就更加之震憾…

——————————
福建德被杀後一个礼拜﹐系湾仔太源街一栋唐楼三楼0既「马氏宗亲会」入面﹐一班「永兴会」高层召开会议…包括「龙头」马文兴﹐「二路」MILK哥﹐「白纸扇」白粉祥﹐「双花红棍」刀手﹐「忠安堂」汉哥﹐「同安堂」咸蛋超﹐同埋唔应该系呢度出现0既陈凯文﹐都系呢度出现﹗
「马氏宗亲会」无华丽0既装修﹐古旧0既吊扇﹐上几代马氏「龙头」0既照片﹐见证0左「永兴会」0既兴衰。今日「永兴会」第六代「龙头」马文兴﹐官仔骨骨﹐斯斯文文﹐口咬雪茄﹐戴「戈斯丹顿」着漆皮皮鞋﹐外表似足一个生意人﹐同上几代「龙头」衣着市井﹐饮「雨前龙井」0既形象好唔同。马生亦同其他「永兴会」「大底」衣着保持市井﹐牛记笠记食红万形象有好大对比。但系呢个烟雾漓漫0既地方﹐着成点都无咩所谓啦﹐个会咪一样系0甘开﹗

「马生﹐福建德死0左我谂『诚和会』果边一定会有动作﹐我地应该点算好呀﹖」先出声0既系满面胡须0既「忠安堂」汉哥。

马永兴无出声﹐由得其他「大底」发表意见。「同安堂」咸蛋超见「龙头」唔出声﹐就讲﹕「我地既然都同『诚和会』反0左面﹐一於去尽﹐炒起成个『诚和会』格屎(注﹕社团)﹗﹗」

「一刀称皇」陈道修通常都唔多讲0野﹐而MILK哥身为「二路元帅」算系「永兴会」第二把交椅﹐亦都系等其他人讲完先发言﹔所以白粉祥身为「白纸扇」﹐即系「永兴会」大脑﹐通常都要出出声﹕「超哥﹐呢次我地同福建德反面﹐系因为福建德搞我地在先。家阵福建德都死0左﹐我地仲去郁其他『诚和会』0既人﹐其他人就会觉得我地『永兴会』实在太恶啦﹗况且今次反面有唔少兄弟都『见红』(注﹕受伤)﹐炒起『诚和会』一定要招兵买马﹐出面『皇气』(注﹕警察)又吹得好劲﹐而家郁『诚和仔』唔系好着数﹗」

「我好赞成白粉祥睇法﹗」马文兴平时开会都好少出声﹐好多时都系由得其他人讲同自己决定﹐但系今次竟然开声﹐所以其他人都感到意外﹐「呢两日我同湾仔陈帮办(注﹕督察)饮过茶﹐佢觉得呢几日实在太多事﹐令佢地好难做﹐仲叫我地唔好太嚣张﹗如果唔系佢地唯有局住做0野﹐近呢两日D『黑脚』(注﹕军装警察)已经成日扫我地D场﹐整到生意淡0左对我地无咩着数﹐同埋铜锣湾成日乱会吓走D客。」

MILK哥吸一啖烟﹐好客气问﹕「阿大﹐我地应该点做﹖如果『诚和仔』唔顺气﹐因为福建德香0左找我地晦气﹐我地应该点应付呀﹖」

马文兴托一托自己副金丝眼镜回答﹕「我同陈帮办饮过茶之後﹐都担心『诚和会』D人唔顺气﹐所以都同『诚和会』坐馆街市杰倾过。其实『诚和会』系铜锣湾系由两个『堂口』管住D地盘﹐『永德堂』福建德同『成德堂』臭口成﹐『诚和』两个堂口本身都唔系好妥对方﹐臭口成又同福建德无咩偈倾啦。今次福建德香0左﹐臭口成都唔知几高兴﹐仲话『成德堂』好想以和为贵﹐唔想同MILK哥你嘈﹗臭口成仲想同Milk哥你合作﹐而福建德个地盘就比我地﹐比廿饼(注﹕廿万)利是比受伤0既『诚和仔』做汤药费﹐摆餐和头酒就当无数罗﹗」

白粉祥不嬲都主张以和为贵﹐对於「龙头」呢个决定几赞成﹕「好好…」

相反刀手听到呢个建议之後面色一沉﹐MILK哥哥样都唔系几好睇﹐咸蛋超更出声闹道﹕「阿大﹐咩咩『成德堂』臭口成有几多斤两呀﹖福建德郁人在先﹐仲叫我地比汤药费﹖当年唔系MILK哥撑福建德﹐个地盘我地早就食0左啦﹐系我地够响够奖呀﹗摆咩和头酒呀﹖我地一於听日就炒起班『诚和仔』﹐要果个臭口成同街市杰一条毛都无﹗』

其实马文兴就一早同「诚和会」倾好福建德死後D手尾﹐见到D「老屎忽」唔高兴自己0既决定异常扯火﹐竟然企起身拍台﹐指住咸蛋超闹道﹕「我系『龙头』﹐所有决定都系为『格屎』好﹗我觉得同『诚和仔』反面无着数就系无着数﹐我地一定炒得起『诚和会』呀﹖你地当其他『瓣数』死呀﹖我地去炒『诚和会』﹐其他『格屎』一个屈尾十﹐乘虚而入系铜锣湾插旗点呀﹖又炒埋第二瓣呀﹖香港成百个『格屎』你炒得晒呀﹖」

马文兴老豆死後做「龙头」以来﹐都未见过佢扯火闹人闹得0甘恶﹐咸蛋超亦唯有谷住度气收声。而一直坐起刀手侧边0既陈凯文亦非常惊讶﹐原来「龙头」外表斯斯文文﹐原来可以0甘恶﹗马生坐返好饮啖茶﹐望一望其他人都全部「哑晒」﹐就继续讲﹕「同『诚和仔』倾掂数绝对有利我地发围﹐我早排就同旺角D骨场倾过﹐斟系果边搞D生意。已经同果边五个场D马夫倾好跟我地﹐我记得MILK哥有个靓仔均呢方面几掂﹐我想阿均帮我手去旺角睇住D场呀﹐马夫同D女﹐唔知MILK哥你有无问题﹖」

MILK哥垂一垂低头﹐之後笑笑口答到﹕「靓仔均跟我0甘耐﹐难得阿大比个机会阿均上位﹐真系要代阿均多谢阿大你呀﹗至於佢原本睇开D场﹐我叫佢手下0既老张同飞鹰睇住应该无咩问题。」

马生见MILK哥爽快答应都好满意﹕「仲有我迟D会系尖沙嘴开间BAR﹐同尖嘴其他瓣数倾好晒﹐包保唔会有人搞事。家阵间BAR装修紧﹐过两个月就开张﹐阿汉你可唔可以叫个人帮手睇住个场同盘数呀﹗」汉哥亦点头赞成。

忽然间﹐马生望住陈凯文﹕「你知唔知点解今日我要见你呀﹖」

陈凯文知道自己系新仔﹐照计呢D「永兴会大底」开会﹐自己根本系唔应该出现﹗望住外表斯斯文文0既龙头﹐心知道今次一定系因为上次系「大中华麻雀馆」失控打大佬刀手﹐龙头先至见自己。阿文只右手不其然0甘震动﹐左面膊头0既刀伤更加隐隐作痛﹐心谂﹕龙头可能系要执行家法惩罚自己﹗

「上次你一条友单拖冲入麻雀馆﹐仲同自己大佬打起上0黎单0野我都听过下。江湖有人话你想『谋』自己大佬﹔但系你大佬系金牌打仔﹐『双花红棍』﹐我觉得比个天你做胆我都唔信你会郁自己大佬。又有人话你系『诚和』二五仔﹔但系你系波楼打到福建德重伤﹐系麻雀馆又系危急关头帮『保家』挡刀﹗讲真﹐刀手D靓个个系义气仔女﹐所以我都唔会信﹗讲比我知﹐你同刀手打﹐其实系咪两个之前一早夹定计﹐等福建德只缩头乌龟以为你地两个鬼打鬼﹐引条友出手之後打爆佢﹖我估得0岩唔0岩﹖」

马文兴呢番说话﹐令到阿文呆晒﹐完全唔知点解「阿公」会0甘讲﹐亦唔知点答﹗马生眼睛转望陈道修﹐阿文真系估唔到刀手竟然点头。见到刀手点头﹐马生仰天大笑﹕「哈哈哈﹗我真系无估错﹐出面D人全部谂错晒﹗刀手同阿文你地果然有计﹐如果唔系福建德条友见我地成棚人杀埋去﹐一定吓到系後门走﹗」大家都对马生呢个解释好意外﹐应该话对马生点解0甘谂好意外﹗

马文兴吸一啖雪茄﹐望住MILK哥讲﹕「阿MILK﹐呢个陈凯文虽然系新仔﹐但系为人有义气又食脑﹐当打当紮﹐福建德个两条街﹐你就交比呢个靓仔睇啦﹗我对呢个陈凯文好有信心…」MILK哥再次垂低头﹐之後再次笑笑口点头…

——————————
凌晨一点﹐MILK哥﹐白粉祥同刀手出现系马师道「忠志诚」打冷铺。白粉祥冷静地讲﹕「马生同以前好唔同呀﹐快快趣趣同『诚和』果边讲点数﹐之後又叫均哥去旺角﹐又系尖沙嘴搞BAR﹗有人话过两年西隧通车﹐马生好似同『合桃』D人倾过﹐斟铜锣湾经西隧D小巴线0既入线费呀﹗MILK哥﹐你点睇呀﹖」MILK哥显得心事重重﹐面如死灰地答﹕「阿大叫走靓仔均…」
刀手依然无出声﹐但MILK哥望住刀手时﹐佢知道刀手明白自己谂紧咩呀…

福建德之死令阿文升价十倍﹐但系着草去澳门0既靓锋﹐同系七仔兼职0既大柠乐江湖前路又会点呢﹖阿文愁眉深锁又所为何事呢﹖<铜锣湾之死>第廿一章<三兄弟之路>快将隆重推出﹐万勿错过﹗